Herlewing

Hy het half-verlate in die tuin gestaan, in die grond geplant naby die voorste heiningmuur. Nie genoeg son gekry nie. Die koue winter was ook nie juis bevorderlik vir vooruitgang en groei nie. Blaarloos, mistroostig en halfdood (so het dit gelyk!) het hy daar gestaan en sukkel. Toe sien ek hom op 'n dag raak en ontferm my oor hom. Ek en ou Jacob verplant die broodboom. In 'n pot met heerlike komposgrond staan hy nou. Ons gee vir hom nuwe huisvesting, 'n plekkie in die son. Ek strooi 'n handvol  beenmeel in die pot. Sommer net vir die wis en die onwis. Dit neem lank voordat daar 'n beduidenis van 'n groenigheidjie te sien is. Op 'n dag is daar 'n vars, nuwe blaartjie! Ek jubel en juig! En toe begin ek foto's neem. Dis wonderlik om boek te hou van sy vordering. Hier is die bewyse: 

 Gister, 22 Januarie 2016, het ek dié foto hierbo geneem. Is die natuur nie net wonderlik nie. Weer eens het ek besef wat liefde en sorg kan doen. Ek sien uit daarna om die groeiproses daagliks dop te hou en te waardeer, die wonder van lewe te ervaar, die nuwe en vars blare aan te raak en ja, om met my eens-versukkelde broodboom heerlike lang gesprekke te voer oor die vreugdes en lewe in die tuin! 

Vetplante

Die wonderlikste plante onder die son! Nie baie afhanklik van water nie en altyd immergroen en mooi! Mens plant elkeen van hierdie (soms) doringlyfies met liefde in jou hande en as jy weer kyk, het dit sommer in veelvoud aangewas en kleintjies gekry. Ek kan my ook verkyk aan die verskillende teksture en vorms, enige kunstenaar se droom! Die flapjack se blare is 'n sagte blougroen, lyk soos iets wat onder in die see kan groei!  

Hier is 'n mooi voorbeeld van 'n kaktus wat vermeerder het met die jare. Eens was dit net een ronde bolletjie dorings en kyk nou!

Sedum, of soos ek dit maar vir myself noem, "vet vingertjies" is van die maklikste groeiers ooit en vertoon baie mooi in enige tuin.

Kwikstertjie

Ek sien hom deur die badkamervenster. Salig gelukkig sit hy op die stomp en versorg sy vere. Vir wie maak hy hom so mooi op hierdie warm Saterdagmiddag? Lieflike ou klein voëltjie met jou skerp bekkie, dun beentjies en lang stert, jy kleur my dag so mooi in!

'n Pakkie in die pos

Om 'n pakkie in die pos te kry, is louter vreugde!! Byna al my kuns en baie van my beter foto's is op my profielblad op RedBubble. Wat baie lekker is van dié blad, is dat 'n mens van tyd tot tyd verskillende produkte daar verkoop aan wie ookal dink jou werk is uitstekend! Dit is elke keer 'n aangename ervaring.

Sodoende gaar mens dan $US bymekaar. En ons almal weet dis meer werd as ons swak Rand. Deur middel van PayPal kan 'n mens enige-iets aanlyn koop soos jou hart begeer en afhangende van hoeveel fondse jy tot jou beskikking het.
Ek besluit toe om van my eie kaartjies te bestel, sommer 'n hele klomp! Die wete dat daar nêrens op aarde nog sulke kaartjies is nie, maak dit 'n hartverblydende aangeleentheid! Groot was my blydskap toe ek dit dus gister in die pos ontvang. Wat gee meer vreugde as 'n unieke en handgeskrewe kaartjie? Ek sien uit om dit aan vriende, vriendinne en familie te stuur! Die drukwerk en gehalte is puik.

Hulle vra so min en gee so baie!

Ek hou hulle al geruime tyd dop. Die kaktusse wat my soveel plesier gee in ons vetplanttuin. Gister was dit nog net sagte pienk knoppe. Vanoggend vroeg toe ek uitgaan word ek beloon met 'n hele klomp blomme. Ek verwonder my aan hul delikate skoonheid, hul perfekte blare in teenstelling met die dorings waaruit hul blomme voortkom. Dis so maklik om hierdie plante te versorg. Hul vra niks en gee alles! Ek dink nie daar is mooier blomme op aarde as hierdie sagte ligpienkes nie!

So het dit gister gelyk: 

En so lyk dit vanoggend: 

Mag jou dag mooi wees! 

Erfenisdag

My dag het met 'n duif begin. 'n Tortelduif wat rustig sit en elke oomblik van sy lewe geniet. 'n Tuin en water. Wat meer wil 'n tortel dan nou ook hê? 

Ou Jacob het gesê hy kom werk. Vakansiedae pas nie sy sak nie. Ek was maar te bly. Drie laventels staan en wag om geplant te word en in my agterkop het ek 'n plan gehad vir die kalerige kol onder die voerplankie, reg langs ons slaapkamervenster. 

 Toe alles klaar geplant is en Jacob aandag aan die res van die erf gaan gee, sit ons daar naby en betrag die "nuwe tuin." Skoongespuit en altevol mooi lyk dit. Oudergewoonte hou ek die kamera op my skoot. Net toe vlieg 'n present uit die bloue hemel en kom sit en mooi lyk op die klippe. 

Ek is in ekstase om my geliefde en gunsteling voëltjie so naby te sien. Janfredrik! Hy ondersoek alles. Oranje stert by tye penorent! Groot was my blydskap toe ek nog een tussen die takke van die granaatroos sien. Dit moet die vroutjie wees! 

Hoe bevoorreg is ek nie net om sommer twee van hierdie pragtige geveerde vriende in die tuin te kan hê nie! Iewers moet 'n nessie wees...
My erfenis is vir my mooi! 

Carpe diem!

'n Mens kan so baie uit die natuur leer! Kyk na die duiwe. Lewensvreugde op sy beste! Carpe diem! Gryp die dag, maak die beste van elke geleentheid, leef gelukkig.

Kleur in die tuin

O, die son skyn weer! Hoera, hoera! Vanjaar was ons betyds met die kraalmis-en komposmengsel, want net nà ons dit uitgestrooi het, val die lieflike reën! Ek raak sommer opgewonde as ek dink hoe mooi die tuin gaan word in die komende dae. Mag jou somerseisoen ook oorloop van helder kleure en vele vreugdes! 

Drie splinternuwe laventels en 'n klein kaktus met geel blomme het kom vastrapplek soek in ons erf. Die donker en ligpienk camelia japonicas blom en in die hoek onder die karee is daar 'n hele paar boslelies (clivias) te sien.

Die lente bring nuwe vreugdes!

Elke seisoen het sy eie kleur, sy eie vreugdes, sy eie geur! 'n Oggend in die tuin is 'n voorreg. Een van die min plesierige dinge wat nie noodwendig geld kos nie. Met 'n dankbare hart en gewillige hande kan mens ver kom. En naby aan jou Skepper. 

Soms moet mens ook net die bekende dinge om jou uit 'n ander hoek bekyk om dit weer splinternuut te kan ervaar. 

'n Lyster kom les sy dors. Lysters behoort aan die sangvoël-familie. Dit is 'n daaglikse vreugde om na hul vrolike liedjies te luister.  

 Die eerste perskebloeisels van 'n nuwe seisoen. 

Gooi jou arms in die wind en haal diep asem. Geniet die oomblik! 

 'n Broodboom wat aandag en liefde gekry het en in 'n pot oorgeplant is met beenmeel, kompos en goeie grond. Die meeste broodbome aard goed in houers en 'n mens moet nou maar net geduldig wees.  

 Die anaboom se stam. Om onder hierdie groot boom te kan staan, is 'n belewenis. Om tussen sy dik takke deur te loer na die suurlemoenboom doer agter, is 'n lekkerte.  

 Wyfie suikerbekkie, mooiste klein voëltjie! Nie so kleurvol soos haar mannetjie nie, maar tog uniek. 

 Roosmaryn se blou blommetjies. Roosmaryn is maklik om te kweek. Elke tuin moet ten minste een roosmarynstruik hê. Wat is lekkerder en mooier as 'n gebraaide skaapribbetjie met 'n takkie roosmaryn daarby? 

 'n Vetplantjie blom. Die fyn wit blommetjie groei gelukkig langs die woeste dorings van die kaktus.