Speel-speel

30/05/2014

Mooi prentjies is belangrik

In die tyd waarin ons lewe is dit lewensbelangrik om elke dag iets moois raak te sien en te geniet. Ons onlangse besoek aan die Kaap en veral Bloubergstrand teen sonsaktyd het gesorg vir heelwat sulke kosbare oomblikke.

Goue aande met donker silhoeëtte op die strand afge-ets groei vir altyd vas teen my kunstenaarshart. Ek wil dit ewig onthou. Ek wil daarna kyk as die wêreld die dag kwyn soos 'n garsland wat doodgaansiekte het. Ek wil die warm kleure van sulke aande soos 'n toemaarkombers om my draai. En ek wil dit ook met jou wat hier lees, deel.

Dis eers as mens kennis gemaak het met die lewe se donker kant, dat jy die mooi in die lewe anders bekyk en ernstig(er) opneem. My mooi herinneringe is vir altyd vasgevang in die prentjies hierbo.

09/05/2014

Sommer net vir die lekker!

Ek was onlangs by Vlu-Noord se kongres waar ek van my kuns uitgestal en verkoop het. Dit was interessant om te sien waarvan die vrouens hou en waarin hulle belang stel. Ek het nog altyd (sommer net vir die lekker) en baie dikwels van my foto's of skilderye gekombineer met my verse. Net omdat ek dit geniet het! En ook omdat ek lief is daarvoor om iets kreatiefs te kan doen elke dag van my lewe hier op aarde. Ek het nooit regtig gedink iemand anders sou dit ook wou hê nie. Dit was dus vir my 'n heerlike aansporing toe ek agterkom dat mense toe nou BAIE van my woordprentjies hou!

Nou moet ek dink hoe ek gaan maak om dit te bemark. Op RedBubble kan 'n mens van my "Woord en Beeld"-kaartjies koop. Die kwaliteit is uitstekend en hoe meer 'n mens koop, hoe goedkoper word dit! Maar ek wil dit sommer tuis ook bemark. Wat dink julle? 'n Mooi gelamineerde kaartjie met 'n versie daarby behoort heelwat mense te verbly.

28/04/2014

My rose en ek

Vir jare sonder tal staan my wit icebergs al langs die paadjie hekkie toe. Tevrede. Tot onlangs. Skielik begin die blare vreeslik erg roes kry en val sommer af. Kaal, dun takkies gryp-gryp in die herfslug rond. Soekend.

Voor ons huis staan 'n yslike groot akkerboom. Iewers vandaan val swart stof oor my rose se blare, taaierig. Ek wonder of dit die akkerboom is wat 'n siekte het. Of is dit net dié tyd van die jaar dat so-iets gebeur? Ek kan onthou dit het verlede jaar ook gebeur, maar voor ek kon bekommerd raak, was dit weg. Ek weet steeds nie wat dit is nie, maar kry my roosbome jammer. Die ander bome in die omtrek het ook almal groter geword en veroorsaak dat daar min son bedags op die rytjie roosbome val. En net daar neem ek 'n besluit. Hulle moet uit! Son toe.

Dis Maandag, die hele wêreld en sy maat hou vakansie, maar my getroue ou Jacob het besluit hy gaan kom werk. Ek is so bly, want dis 'n fees om buite te wees! Ons verplant een na die ander, maak plek tussen die reeds bestaande rose in die bedding naby die fontein. Heeldag skyn die son heerlik warm daar. Nie eers een van die roosbome wat daar groei, het 'n roeserige blaar aan nie. Dit moet net werk. Ons maak die gate vooraf vol water, haal die bome versigtig en met moeite uit en plant hulle onmiddellik oor in die nuwe omgewing. Dit lyk sommer mooi!

Nou het ek wit, pienk en wynrooi, oranje en bloedrooi rose, almal deurmekaar en bymekaar. En langs die paadjie na die voorhekkie, lyk die wilde knoffel heel gesellig. Miskien maak ek later 'n ander plan daar, dis mos hoekom tuinmaak so lekker is, dis heeltyd speeltyd!

05/04/2014

Duiwe

Kransduiwe, tortelduiwe, rooiborsduifies. Heeldag en elke dag. Soggens as ek wakker word, hoor ek hulle. Saans as ek gaan slaap, koer hulle my tot binne-in droomland in. 'n Sag-geluid, rustig. 'n Geluid wat vrede en vreugde en saamwees uitspel. So mooi. En nooit word ek moeg om foto's van hulle te neem nie. Kom kyk!!

Amper slaaptyd

'n Lekker bad om te geniet!!

'n Klein ou babaduif in die tuin.

Altyd tuis op die huis se dak.

Blink duiwe oë.

Sagte vere van 'n duif.

01/04/2014

Kosmos

O dis lekker om te lewe!! Vanoggend voel ek sommer net lus om koers te kies iewers heen en foto's te loop neem. Ek het gister doelbewus en doelgerig die ou Pretoriapad gevat om die kosmos wat dié tyd van die jaar blom, te gaan afneem. En toe met net vyf foto's teruggekom, net genoeg om vir nog meer lus te word.

Hemels! Wat 'n verrassing was hierdie foto nie! So skoon en suiwer. Lieflik is die wêreld in herfstyd.

Sommer 'n hele plaat pienk en wit vreugdes bymekaar!

'n Grondpad draai links uit, die klip en die paal lê nommerpas langs mekaar.

My oorlede Ma se gedig pas so mooi by hierdie foto.....

KOSMOS

Soos vlinders vrolik, fladderend

waai kosmos in die wind

langs paaie deur die vleie

en oor die bulte ver

wieg prettig, pienk en pers

die blommemassa fyn

soos kant en sy gespin -

in herfs blom kosmos oor ons land

Wie het die veld geploeg, geplant,

Wie het dit daar gesaai?

Sy hand het dit geskape

Sy hand het dit formeer,

Ja in Sy grote Kosmos

Is Hy van alles Heer!

(Maureen Grobler)

Daarom ry ek toe vanoggend sommer 'n rigting in met die hoop dat ek nog meer plate en plate kosmos sal sien. Helaas! Daar was toe nie so baie nie, maar darem mooi genoeg om te geniet!