Drie vlieë met een klap

Soos julle teen dié tyd waarskynlik al weet, ek is lief daarvoor om te speel! Hier is die resultaat van twee volle dae se heerlike spelery. DRIE dinge waarvan ek baie hou om te doen: teken, speel, verf. Die lyne is met Bostic Clear gom gedoen. Dit word aan die brand gesteek sodra die lyn getrek is. Dit veroorsaak dan 'n interessante tekstuur. 

 O ja, hierdie prentjiekinders van my is almal "aan die brand"!

Ek wens so iemand sien my prentjies raak en bestel 'n duisend van hierdie kinderkunswerke, want ek glo nie ek gaan ooit in my hele lewe moeg word om stokkiesbeen-kinders te verf nie. Dis mos maar in my bloed. Kom lees gerus "Stories uit my skooltas", dan sal jy alles en nog meer verstaan.

Hierdie kuns is op hardbord gedoen. Op die oomblik nog ongeraam. Grootte: 53 x 27 cm.  Te koop.

Vir baie jare het ek die voorreg gehad om te kon skoolhou in al die provinsies van ons land Suid-Afrika. Dikwels het ek sketse soos hierdie op die bord met kryt gedoen om werk aan kinders te verduidelik. Hoe gou het hul ogies geblink as hulle a.g.v. my stokmannetjieprentjies skielik alles wat moeilik was kon VERSTAAN. Dat ek dit geniet het, is 'n waarheid soos die son wat buite skyn. 

Teken 'n otjie

Maklik! Trek 'n sirkel....en nog een...en nog een, teken die ore, die stertjie, die pote....jy kan mos al 'n driehoek maak....teken sy oë, sy neusgate en moenie die glimlag vergeet nie!

Sien, dis maklik!

 

 

Probeer nou dié een....toe, jy kan!

 

 

En hier is Oupa Krulstert vir dié van julle wat niks skrik vir 'n pen of potlood nie....geniet dit!

 

 

Jare terug het my Graad Eens hierdie versie so mooi opgesê:

 

Otjie Potjie Vette Vark,
werk in die tuin met sy langsteel hark,
hy hark en hy hark tot die steeltjie breek
en vir Otjie Potjie "boems!" in sy magie steek....