Kleinkinderkuns op 'n Saterdagoggend.

Die dag lê oop voor ons en wag....wat gaan ons drie daarmee maak?
"Ouma, ons het nog nie eers een keer geverf nie, Ouma werk net!!"  sug Isabella na haar vroegoggendkoffie-in-die-bed.
"Hmmmmm, dan moet ons 'n plan maak né!" sê ek en voel al klaar 'n heerlike kriewel van lekkerkry net by die gedagte om te kan verf.
 

Na ontbyt dra ons die verwarmer na die rondawel toe, pak die tafel vol koerantpapier, maak ons bekertjies vol water, kry die verf uit die kas asook lekker dik waterverfpapier om op te werk en daar begin die pret!! 

Na 'n rukkie lyk Isabella se kunswerk so mooi! Die hele doel van dié kastige kunsles is om dit te GENIET. Sy het so lekker met die verskillende kleure gespeel. Die konsentrasie was natuurlik vir my 'n heerlikheid om te aanskou.  

 

Hierdie een wen die eerste prys in "Ouma se uitstalling"....dink jy nie ook dit is allermoois nie?

Ek wonder wat alles in die verbeelding aangegaan het toe sy hier geskilder het....
Isabella reken dis "dromerige patrone".... Ouma se ou bokkie!

 

Hier is Reuben (6)  se skeppings: abstrakte kinderkuns op sy lekkerste! 

 

Ons hou baie van die mooi kleure!

Natuurlik woon die drie beertjies in hierdie ou mooi huisie. Gouelokkies is op pad, sy behoort teen elf uur hier te kom aanklop. 

 

En so tussendeur het ek (die Ouma) ook toe maar 'n eenvoudige kunswerk die lig laat sien. Laat my nogal dink aan Namibië se droë bome en uitgestrekte vlaktes. Ek wens so ons kan eendag die geleentheid hê om dié indrukwekkende land te kan besoek.....

 

 

En hierdie was sommer net vir die lekker!!

 

Miskien eendag ver vorentoe sal my kleinkinders 'n koue Saterdagoggend vol helder kleure onthou. Kleure wat ons almal se harte warmbly gemaak het!

 

Later die middag het ons klippe geverf wat hulle kan saamneem as presentjies

vir hul familie in Lydenburg.  Dit het ure geneem om klaar te kry, maar dis pragtig kleurvol en kan dalk vier harte bly maak!

 

 

Blog jou!!

Ek het vandag heeldag probeer om 'n nuwe blog te maak om my kuns en foto's te bemark, ( lees VERKOOP) maar alles tevergeefs sê die Prediker mos....alles tevergeefs! Iewers op die internet was 'n gogga wat my gekeer het en ek kon net nie die "create a blog"-opdrag uitgevoer kry nie. Dis hoekom ek nou maar weer hier op SPEEL-SPEEL kom speel.

Ek het heelwat kuns wat te koop is. Maar ek woon nie in Pelgrimsrus of Dullstroom of iewers aan die Weskus waar kuns baie byval vind nie. O jaaaa, ek bemark my werk op RedBubble en ook op Paintings I love en ook op ons eie Suid-Afrikaanse kunswebblad South African Artists.com, maar kan 'n mens ooit genoeg bemarking doen?

Dis so bitter baie lekker as iemand uit die bloute laat weet hy/sy stel belang in dit of dat en kan ek/mag ek/wil ek/sal ek asb. vir hom/haar 'n groot /groter weergawe daarvan skilder..... ai, dis heerlik!! Ek neem ook graag foto's...prentjiesmaak is maar net in die gene! Wat 'n heerlikheid op aarde is dit nie.

Nouja, kom kyk wat is beskikbaar, hier is 'n paar voorbeelde....geniet dit!!

 

 

 

 

 

 

Al vier skilderye hierbo is ongeraam, beskikbaar. Prys: R890 Grootte: 35 x 43 cm.

 

 

Geraam en gemonteer: Te koop. Prys: R2100

E-posadres: ekendall1402@gmail.com