Kleur is orals

Nà die baie reën lyk die wêreld sommer anders. Kom stap saam met my deur die tuin! 

GROEN mos klou vas teen klippe en boomstamme. 

Ek kan my verkyk aan die lyne en patrone van die ornamentele gras by die voëls se waterbak.

Kuns in die natuur. 

 

Bloedrooi blom die gerberas. 

Oos wes, tuis bes!

Daar's water!!

Sedert die 1e Maart 2014 reën en reën en reën dit aanmekaar hier in ons kontrei en in groot dele van ons lieflike land. By baie plekke is daar yslike oorstromings en baie skade en voel 'n mens jammer vir mense wat daardeur geraak word. Hoe klein is ons krag teen die mag van die natuur, ons is eintlik maar weerloos. Hier by ons het tot dusver 200mm. reën in twee weke geval. Dis BAIE!

Vir iemand wat lief is vir foto's neem, is daar skielik sommer baie meer kiek-geleenthede. Ek sien prentjies in my tuin, prentjies wat weer gaan verdwyn as die son volgende week dalk skyn.

Die ou gekraakte sementpaadjie(wat ek nie wil regmaak nie, dit gee mos karakter!)

'n Blinknat paadjie na die voorste hekkie toe.

Poele water oral.

Groen, groen, groen.

Die tuin floreer!!

Chris en Brakkies doen voorraadopname! 

Voor die klein hekkie lê 'n dam, 'n plas, 'n poel!

Hagar en Brakenjan wonder wanneer gaan die son weer skyn...

Druppels hang soos 'n kantgordyn van die dak af.

NAT!

Die wolke maak prentjies op die nat plaveisel, so mooi vir my!

"Kom speel tog nou bal!"

'n Hadeda, die enigste een wat hoog en droog alles bo uit die denneboom dophou.

Wolke vol wit beloftes van nog reën. 

Herfs se eerste tekens hang in geelgroen blare buite. 

Nat appelkoosboomblare by die agterdeur. 

Die peppadews is groen-gelukkig!

En die lugplant lag van blydskap!

Hondekinders

"Honde is wonderwerke met pote!" het iemand eenkeer gesê. Dis so waar. Ons twee honde kwalifiseer beslis. Geen sielkundige behandeling in die hele wêreld kom naby 'n "kuiersessie" met 'n mens se honde nie. 'n Mens moet tyd maak daarvoor, want dis ewe belangrik vir jou en jou honde om spesiale kwaliteit-tyd saam te spandeer.

Honde is die hartklop by jou voete. Hul onvoorwaardelike liefde is eindeloos en onmeetbaar. Miskien is die rede dat 'n hond een van die grootste troosters is as jy ongelukkig of hartseer voel, geleë in die feit dat hulle geen vrae vra nie. 

Het julle geweet dat honde kan glimlag? Hulle glimlag met hul sterte!

 'n Hond kan 'n mens se beste vriend wees

 ....en ook mekaar s'n!

 My doel in die lewe is om so 'n goeie mens vir my honde te wees soos wat hulle dink ek is!

They never talk about themselves but listen to you while you talk about yourself, and keep up an appearance of being interested in the conversation.  ~Jerome K. Jerome

Tuinpraatjies.

Toe ek vanoggend baie vroeg wakker word, het dit gereën. Ek was onmiddellik bly, sommer baie.  Toe ek teen elf uur tuin toe wandel nà ek al my werk binne klaar gedoen het, raak ek totaal opgewonde. Die rede vir my handvol klein vreugdes sal jy waarskynlik in elkeen van hierdie foto's kan raaklees. 

 'n Babaduif sit tjoepstil skaars twee treë van my af. Sy ou veertjies duifsag. Weerloos en wonderlik.

 Ek kan nie wag dat my vetplant (ek dink dis 'n tipe Stapelia) gaan blom nie. Kyk net hoe vol beloftes sit dit daar aan die punt van die dunnerige groen stammetjie.  Ek het nie 'n idee watter kleur die blom gaan wees nie, lyk asof dit pienk of pers is.  Dis ook baie groot in vergelyking met die plant.

 Nog 'n paar gelukkige plantjies!

 Verskillende teksture: Pride of India boomstam en garingplante langs mekaar.

 Abstrakte KUNS in die natuur! Inspirerend.

 Dit lyk kompleet asof iemand met groen vetkryt die boomstam probeer inkleur het. Moeder Hen-en-haar- kuikens floreer in die semi-skadu onder die silwereik.

 Pennyroyal groei langs die huis. 'n Krui wat baie doeltreffend en op baie maniere gebruik kan word. Die reuk daarvan is heerlik! Dit kan gebruik word om muskiete weg te hou,  om kieme dood te maak en ook vir die behandeling van velprobleme. Dit help ook om vlooie van honde of katte weg te hou. In kos kan dit as geurmiddel gebruik word. Dit kan  ook 'n verfrissende geurmiddel in parfuum en seep wees.

Het jy al kaalvoet oor pennyroyal gestap? Probeer gerus.

 'n Mossie kom sit en droom op die rondawel se grasdak. Een van die heelmooiste voëltjies in my tuin en altyd gelukkig. Wat sou die wêreld tog wees sonder mossies?

 Woestynrosies groei oral in die tuin, hierdie een "blom" van gesondheid.

 'n Rukkie terug het my niggie vir my peppadews gebring. Ek het die saad gesaai en kyk net! Een van die dae gaan ek olywe sny saam met songedroogde tamaties en peppadews en dit in 'n slaai of roereier mengsel gebruik, njammies!!

Kos met kruisement daarby is mos koningskos. Kruisement verkwik enige mens se siel.  Kruisement aard in ligte skaduwee, maar dit hou van ’n paar uur sonskyn per dag. Myne groei salig onder die perskeboom in die agterplaas. 

Toe ek weer binnetoe kom, voel ek SKATRYK.

Die kwikstertjie

Vanoggend is dit nie so warm nie en ek dwaal deur die tuin op soek na die kwikstertjie wat my nou al hoe lank roep. Ek hoor sy liedjie deur die oop vensters. Ek sien hom hop-hop oor die gras. Vandag is die dag dat ek 'n foto van jou neem my ou maatjie!! "Klik!" net toe hy met grassies in die snawel vir een enkel sekond op die huis se dak tot stilstand kom. Dankie tog! Om dié klein vinnige karnallie af te neem, is gladnie maklik nie.

 "As hy staan, dan gaan hy en as hy gaan, dan staan hy!" het iemand een keer gesê. Picasa het my gehelp om hierdie rooi-en-blou prentjie te maak. Hou jy ook daarvan? 

Die kwikstertjie (ook kwikkie, wipstertjie of akkermannetjie) is 'n klein voëltjie met 'n lang stert wat algemeen in Suid-Afrikaanse tuine en op die seefront aangetref word. Dit het 'n duikvlug en op die grond beweeg die stertjie heeltyd op en af. 'n Treffender soort is die bontkwikkie van KwaZulu-Natal en die Victoria-waterval.
(Wikipedia)

Blommetjies

Gerberas of  Barbertonse madeliefie is 'n meerjarige blomplant wat mooi madeliefieblomme aan lang stele voortbring. Die blomme kan verskillende kleure wees. Die plant groei taamlik vinnig en verkies vol son en matige water. Die blomtyd is tussen September en Januarie.  Gerberas is baie besonderse snyblomme vanweë hul verskeidenheid van helder kleure, hul vorm en lang vaasleeftyd. Dit kan tot twee weke hou in water. Sny die stele elke derde of vierde dag aan die onderpunte af en gee vars water.

Gerberas word ook as lieflike potplante benut en geniet. Die Barbertonse madeliefie is ook die embleem van die Blou Bulle.  Hoop jou dag is vandag so kleurvol soos hierdie mooi en bekende blommetjies!

Hier kan jy ook meer lees oor die Gerbera en die lieflike kleureprag geniet.

 

Wat is nou eintlik die heel lekkerste?

Van al die soorte kuns wat ek doen, is waterverf die heel lekkerste. Vandag was dit! So skoon. So gewillig. So "kunserig". Môre skilder ek dalk weer met akriel, dan is dìt weer die heel lekkerste.

 Vandag het ek heerlik rustig sit en verf aan 'n landskap. Dis somer en warm daarbuite, maar hier waar ek die dinge doen waarvoor ek tyd het en waarvoor ek lief is, was dit heel gesellig en baie aangenaam. Wat 'n voorreg om Godgegewe talente te kan gebruik, om genot daaruit te put en om dit te kan deel met wie ookal hier kom inloer. Ek is dankbaar daarvoor. 

In summer, the song sings itself. ~William Carlos Williams

Drie vlieë met een klap

Soos julle teen dié tyd waarskynlik al weet, ek is lief daarvoor om te speel! Hier is die resultaat van twee volle dae se heerlike spelery. DRIE dinge waarvan ek baie hou om te doen: teken, speel, verf. Die lyne is met Bostic Clear gom gedoen. Dit word aan die brand gesteek sodra die lyn getrek is. Dit veroorsaak dan 'n interessante tekstuur. 

 O ja, hierdie prentjiekinders van my is almal "aan die brand"!

Ek wens so iemand sien my prentjies raak en bestel 'n duisend van hierdie kinderkunswerke, want ek glo nie ek gaan ooit in my hele lewe moeg word om stokkiesbeen-kinders te verf nie. Dis mos maar in my bloed. Kom lees gerus "Stories uit my skooltas", dan sal jy alles en nog meer verstaan.

Hierdie kuns is op hardbord gedoen. Op die oomblik nog ongeraam. Grootte: 53 x 27 cm.  Te koop.

Vir baie jare het ek die voorreg gehad om te kon skoolhou in al die provinsies van ons land Suid-Afrika. Dikwels het ek sketse soos hierdie op die bord met kryt gedoen om werk aan kinders te verduidelik. Hoe gou het hul ogies geblink as hulle a.g.v. my stokmannetjieprentjies skielik alles wat moeilik was kon VERSTAAN. Dat ek dit geniet het, is 'n waarheid soos die son wat buite skyn.