07/06/2012

Haasbek


Hier waar my voorste tandjies was
is nou 'n groot, oop plek
dit voel omtrent so wyd
soos Pa se motorhek!

Ek druk my tong daardeur
en wikkel ook my ore -
die meisies in ons klas sê:
"Hy is seker so gebore!"

Wat hulle nou nog gladnie weet
is dat ek oor 'n jaar of tien
die mooiste glimlag uit gaan pak -
dìt sal hul self nog sien!

Hul beentjies sal so bewe,
hul hartjies sal so klop...
en ek sal stilweg glimlag -
Ou Tandmuis is gefop!


Elizabeth Kendall ©

05/06/2012

Slim kinders skryf sinne






Dit was in daardie jare die grootste bevrediging om so teen die einde van die tweede kwartaal te begin sien hoe die Graad Eens al ouliker word met sinne skryf. 

Dit was lekker om te weet  jy het dit vir hulle geleer! Aan die begin van die jaar kon hulle nog niks doen nie en kyk dan nou! Die humor wat daarmee saamgegaan het, was miskien die lekkerste deel. Hul spelling was gewoonlik baie foneties: 

Ons was Sansiti toe en my pa het gedobil

Ek eet apil koos konfyt op my broot

Toe daar honger sloot in die land was….

Dit was baj lekker by die see

Meneer Kreer is ons hoof

Ons skryv skriv

Ek gaan ‘n steviekaat kry vir djoedou

My juffrou draa boetse en sy jelp as ek ‘n vout maak

My pa maak kast hy dra swaar goet

My ma het spesiehaal hys toe gekom om iets op die tiewie te kyk

Ek eet graag soeper sie

My pa en ma pikly oor die bou ‘n ry aan ons stranthys

My ma word kwaad vir my pa as hy jultuit sport kyk

Mamma bêre haar lipstif en paravien in haar handsak

Ons bly in Jammelpak (Riamarpark)

Die pen is haarne, ek het nie sulke pen nie

Ek gaan ‘n in geneer word dan teekin ek vir die bouers plani

Ek wil in ‘n dibilverdieping huis bly met ‘n borilbat en ‘n waterbet

Elizabeth Kendall©


03/06/2012

Boepenaalkie



Wil jy graag weet waar kom ek vandaan?
Diep onder uit die see
Of anderkant die maan…
Het ek gery op n groen seeperdjie se rug
of  aan sterretjies geswaai doer bo in die lug?
 Met klippies en skulpies op wit seesand gespeel
of ‘n stukkie geel kaas met Maanman gedeel?
 Met dolfyne op golwe se deinings gery
of teen die reënboog se kleur afgegly?
Ek is Boepenaalkie en ek kom by jou speel
om met jou my lekkerkry  versies te deel.

Kyk rondom jou…
 Kiepiekraai het ek die son sien uitloer
almal het skielik gespring en geroer
 Goggas en wurmpies het vir kossies geskarrel
wild het die windjie met blare gedwarrel
 Blommetjies bont in so baie kleure
almal is anders met die heerlikste geure
Vrolik het voëltjies hul liedjies gesing
en sag sagste donsies vir nessies gebring
 Ek is Boepenaalkie en my hartjie is bly
want met my versies gaan ons baie lekkerkry!


Sleepvoetjiemoeg…
 Die son gaan al slapies
dis die einde van die dag
ek val sleepvoetjiemoeg in boepenessie so sag
my hartjie is vol van die heeldag se mooi
huistoe gehuppel met sononderrooi
 reënwater wat in modderdammetjies blink
en swaeltjies wat vir oulaas rinkink
 met mammaduif se koer koer doek koer
het sekelmaantjie oor die rantjie geloer
Ek is Boepenaalkie ek wens ek kon sing
maar nou skryf ek versies wat glimlaggies bring!
 
Elizabeth Kendall en Antionette Frieda du Bruyn ©


02/06/2012

A wish


May you have a jolly day:
A singing, dancing holiday!
Catch a sunbeam, catch a star..
You must skip and shout:
Hurrah!
May the birds then sing to you
peace and joy and lots of laughter -
days of spring forever after.


Philip de Vos




01/06/2012

Mpho loop weg - Deel 2

Waar is Pa?

                    Hy spit.                    
 

Waar is Ma?

Sy kook kos.

Mpho loop.

Hy sien 'n hen.

Die hen sit op haar nes.
Dis hen is bly.

Die hen het kuikens.


Mpho tel die kuikens.

Daar is een, twee, drie, vier, vyf kuikens.


Mpho vat een kuiken.

Hy druk die kuiken in sy sak.

Nomsa lag.


Die kuiken piep.

Mpho loop.

Die kuiken is in sy sak.



Mpho praat met die kuiken.

Die kuiken piep in Mpho se sak.


Mpho loop en loop.

Hy loop weg.

Die kuiken piep nog.


Mpho sien 'n koei.

Die koei het 'n kalf.


Mpho loop verder.

Hy sien 'n perd.

Die perd het 'n vul.


Die hen het kuikens.

Die koei het 'n kalf.

Die perd het 'n vul.

Pa en Ma het kinders.



Mpho is Pa en Ma se kind.

Die kuiken is die hen se kind.

Mpho wil ook iets hê.

Mpho wil die kuiken hê.

Nou is die kuiken syne.



Mpho word moeg.

Die kuiken is nog in sy sak.

Die kuiken piep.

Elizabeth Kendall ©
(Word vervolg)





31/05/2012

My baby sister


She is small
and I am tall
but the two of us
are having a ball!


We play our games,
we know our names
and when it's night
we sleep so tight.


Elizabeth Kendall ©

30/05/2012

Die lewe

Gr.1:

Wat Juffrou sê is alles waar
en sy weet baie, dis nou klaar!
"eet jou groente en jou vleis.."
Ek eet my kos, ek sal haar wys!

Gr. 5:

My Juffrou dink sy kan ons leer
wat ek al weet, kan sy probeer!
Ons kou ons chappies ongemerk
en maak maar of ons kliphard werk..

Gr. 7:

My laaste jaar het aangebreek
met Meneer kan ons die draak nou steek!
Hy dink nog hy kan ons vertel
toe weet ons als, né my ou pêl?

Gr. 8:

Hoërskool toe moet ek nou gaan -
wie is daar wat my verstaan?
Ek haat die goor ou Algebra
en volg die nuutste modes gretig na...

Na Gr. 12:

My skooldae is nou tog verby
nou voel ek, o, so salig VRY
Ek's nou mos vreeslik slim en groot -
koop en smeer my eie brood!

Eerste x 'n ouer:

En eendag sit ek op my stoep...
was dit my Ma wat ek hoor roep?
Sleg geslaap verlede nag -
nat doeke lê: 'n hele VRAG!

Later:

En nou's my kinders ook al groot,
sit nie meer op Pa se skoot...
skool toe moet hul ook al gaan
en leer om vroeg-vroeg op te staan

Ouer in jare:

Stil-alleen hier sit ek nou:
peins en droom, lag in my mou -
die lewe is een lang, lang les:
doen jy maar elke dag jou
BES!
Elizabeth Kendall ©




Hasie wit


Hasie wit

doodstil in die gras gesit

rondgewip

en

weggehol

net 'n

bolletjie

spierwit

wol!

Elizabeth Kendall ©

Blou voël


Blouste blou voël op die tak
hoe weet jy as die son gaan sak,
hoe weet jy waar die winde waai
en of die hoenderhaan
weer vroegdag kraai?



Jy sit so lekker rustig daar
jou stertjie is 'n klawerblaar,
jou ogies sien so alles raak -

jy het my dag weer mooi gemaak!

Elizabeth Kendall ©

My hoendertjies



Op my plasie langs die dam
het hul weer nes gemaak -
twee hoendertjies, so bontgeveer,
het aan my hart kom raak...

hul pik en skrop die heeldag lank
hul maak my tog so bly -
want in hul nes, teen aand se kant,
sal ek drie eiers kry!

Elizabeth Kendall ©

29/05/2012

Treinry


Silwerblink lê die spore
van my yslik' grote trein
en ek allenig is die drywer
al dink hul ek's nog klein

Ek trek die enjin volstoom oop
hoe vinnig kan my trein dan loop?
Die wiele dreun
ek hoor die fluit...
my pad loop teen die hoogste bulte uit
en af, af in 'n diepe kloof
wie my nie hoor nie, is mos doof

Dan maak ek nog 'n laaste draai
en kom eers tuis nà hanekraai!


Elizabeth Kendall ©

Mpho loop weg- Deel Een

Mpho loop weg.
Mpho sit.

Hy kyk na die deur.

Die deur is toe.

Mpho maak die deur oop.

Hy gaan uit.

Mpho speel buite.

Hy sien 'n bal.

Dis 'n rooi bal.

Die rooi bal lê op die gras.

Wie loop daar?

Dit is Nomsa.

Sy is 'n dogter.

Mpho en Nomsa speel

Hulle speel met die bal.

Leesboek- Elizabeth Kendall ©
(word vervolg)







Jy



Pluk vir my 'n blom
as jy weer hierlangs kom
want dan kan ek dit vir jou sê -
dis JY wat ek wil hê!



Elizabeth Kendall ©

Lente



Ek wil sing en spring en juig
tot waar die hoogste bome buig
want lente is mos in die lug..
Winter het sleepvoet weggevlug!

Elizabeth Kendall ©

My kat

Sy spring deur die venster
"kadoef" op my mat,
sy skuur teen my bene,
my liefste ou kat...

Ons loop in die gang af
om kos te gaan haal-
ek is so vet
en sy is so skraal

Haar dankie kom sê sy
so sag by my oor:
'n "prrr-prrr" wat niemand,
net ekke kan hoor.

Elizabeth Kendall ©

Soggens vroeg

Ek hoor 'n duifie in my tuin
hy koer sy versie fyn
en sing sy sagte duiwe-lied
vol vreugde en verdriet

Ek spring met blydskap
uit my bed -
dit was 'n vredesduif...
ek wed!



Elizabeth Kendall ©

'n Seunskind


Mamparras is mos altyd bang
van kleintyd tot hul groot is -
hul beentjies bewe mos vir als
totdat hul eendag dood is.

Maar ek's 'n dapper ramkat
die sterkste in ons klas!
Ek groei skoon uit my klere
my broek wil nie meer pas.

Ek bou 'n boomhuis buite,
ek slyp my jagtersmes -
vakansietye skiet ek
sonder om te kwes...

En as dit netnou aand word
moet ek alweer gaan bad:
dan kies ek sommer
maklik die lekker hasepad!


Elizabeth Kendall ©

As ek eendag groot is



As ek eendag groot is
wil ek 'n sterk man hê,
ene wat nes my pappa
'n mondvol dinge sê!

 
As ek eendag groot is
wil ek 'n mamma wees -
Ek wil sewe kinders grootmaak
en vir hul stories lees!

As ek eendag groot is
wil ek ver, ver weg gaan reis
na vreemde lande kyk
en eet van hulle vleis!

Maar nou is ek nog klein
en sit nog in Graad Een:
'n regte stoute snipsnater
en 'n parrabeen!

Elizabeth Kendall ©